Sino Ba Si Kristo?

Ilang araw na lang at Pasko na.  Kaya naman naitanong ko sa aking sarili kung sino ba siya. Kilala na ba natin kung sino si Kristo?

Malimit nating sinasabi na Kristiyano tayo, pero maraming bagay pa na ukol kay Kristo ang hindi natin nalalaman.

Maliban sa kaalamang si Kristo ay namatay, nabuhay at magbabalik sa wakas ng panahon, may alam pa ba tayong ibang totoo?

Totoo ba na mahaba ang kanyang buhok na katulad ng nasa larawan? Bakit naman ipinagbawal ng mga Apostol sa mga lalake ang may mahabang buhok?

1 Cor 11:14 Hindi baga ang katalagahan din ang nagtuturo sa inyo, na kung may mahabang buhok ang lalake, ay mahalay sa kaniya?

Totoo ba na mahaba ang kanyang damit na katulad ng nasa larawan? Bakit naman niya ituturo sa mga Apostol na mag-ingat sa mga escribang may mahahabang damit?

Mk 12:38 At sinabi niya sa kaniyang pagtuturo, Mangagingat kayo sa mga eskriba, na ibig magsilakad na may mahahabang damit, at pagpugayan sa mga pamilihan.

Totoo ba na kinatitisuran siya ng kanyang mga kapatid na babae?

Mk 6:3 Hindi baga ito ang anluwagi, ang anak ni Maria, at kapatid ni Santiago, at ni Jose, at ni Judas, at ni Simon? at hindi baga nangaririto sa atin ang kaniyang mga kapatid na babae? At siya’y kinatitisuran nila.

Totoo bang sinabi niya na hindi si Maria ang kanyang Ina?

Mt 12:46-50 Samantalang siya’y nagsasalita pa sa mga karamihan, narito, ang kaniyang ina at ang kaniyang mga kapatid ay nangakatayo sa labas, at ibig nilang siya’y makausap. At may nagsabi sa kaniya, Narito, ang iyong ina at ang iyong mga kapatid ay nangakatayo sa labas, na ibig nilang makausap ka. Nguni’t siya’y sumagot at sinabi sa nagsabi sa kaniya, Sino ang aking ina? at sino-sino ang aking mga kapatid? At iniunat niya ang kaniyang kamay sa kaniyang mga alagad, at sinabi, Narito, ang aking ina at ang aking mga kapatid! Sapagka’t sinomang gumaganap ng kalooban ng aking Ama na nasa langit, ay siyang aking kapatid na lalake at aking kapatid na babae, at ina.

Hindi ko ibig na kayo ay magulumihanan. Nais ko lamang mapansin ninyo ang mga katotohan na nabasa ko at natunghayan mismo sa aklat ng Panginoon. Masakit mang tanggapin pero eto ang nagdudumilat na katotohanang di mapapasubalian ninoman sapagka’t ito’y nasusulat at hindi ko ito gawa-gawa lamang.