Langgong

Langgong is an Ilocano word na ang ibig sabihin ay iyakin. Yang kaspangarigan nga pala kahit di ninyo tinatanong ay ilocano word din na ang ibig sabihin ay “for example”, “kung”, “if ever”.

Kailan nga ba ako huling umiyak? Kahapon lang ba, madalas o matagal na?

Naalala ko tuloy ang Daddy ko nung nabubuhay pa siya. Kapag isinasama niya akong manood ng pelikula ni Dolphy at Chiquito, nakikita ko siyang umiiyak. Ako naman eh wala lang, mas hilig ko kasi si Fernando Poe Jr, Tony Ferrer at Bernard Bonin. Malay ko ba sa drama ng buhay eh maliit pa ako noon.

Ang buhay daw kasi ay parang pelikula. Maliban sa nakaka-relate ka sa istorya, nababagbag ang iyong damdamin at naawa ka sa sinapit ng  bida sa pelikula.  Ito ay may umpisa at may katapusan at ang malimit na ending ay: “And they lived happily ever after”. Kaya nga kapag namatay ang bida ay parang walang kuwenta yung pelikula.

Sa totoong buhay ay ganun din. Pagkatapos mong umiyak eh nakakaramdam ka nang gaan ng kalooban. Ang feeling ko kasi noon eh babae lang ang umiiyak at bakla o binabae lang ang mga lalaking umiiyak.

Lam 1:16 Dahil sa mga bagay na ito ay umiiyak ako; ang mata ko, ang mata ko ay dinadaluyan ng luha; sapagka’t ang mangaaliw na marapat magpaginhawa ng aking kaluluwa ay malayo sa akin: ang mga anak ko ay napahamak, sapagka’t nanaig ang kaaway.

Ganun pala yun, isa pala itong paraan nang pagtawag. Umiyak ka nang umiyak para lumapit ang mangaaliw ng Dios nang ikaw ay guminhawa at mawalan ng kabagabagan.

Phil 4:6 Huwag kayong mangabalisa sa anomang bagay; kundi sa lahat ng mga bagay sa pamamagitan ng panalangin at daing na may pagpapasalamat ay ipakilala ninyo ang inyong mga kahilingan sa Dios.

Sa tuwina nga na maramdaman ko ang kabalisaan at kabagabagan, ako nga’y iiyak at mananalangin maging araw-araw o maya’t maya kahit pa ako’y tawagin ninyong  isang langgong.

Kayo oo nga ikaw? Kailan ka huling nagdasal nang umiiyak?