Laway

Ang hirap naman yata ng katuwiran na kaya ka hindi naniniwala na may Dios ay sapagka’t hindi ka sigurado kung ang sinasabi ng Bibliya na ginawa ng tao sa iyong pansariling pag-aanalisa ay maaaring totoo o gawa-gawa lamang ng mga Kristiyano ng unang panahon.

Ibig sabihin, hindi ka sang-ayon sa gawa lang ng tao. Ang silya na gawa ng tao, bakit ka naka-upo? Ang history books na gawa lang ng tao, bakit mo ginagawang reference? Ang hangin na gawa ng Dios, bakit mo hinihinga? Ang isip na hindi naman gawa ng tao, bakit mo ginagamit?

Una, dapat nating malaman na walang salita ang Dios na di may kapangyarihan.

Jn 13:19 Mula ngayon ay sinasalita ko sa inyo bago mangyari, upang, pagka nangyari, kayo’y magsisampalataya na ako nga.

Hindi ito yung mga hula na hindi naman nangyayari katulad ng mga rebelasyon ng tao sa paggunaw ng mundo na puro mga palpak lahat.

May mga bagay sa mundo na hindi batid ng kahit anomang karunungan ng tao at kahit na ang mga Siyentipiko ay hindi maipaliwanag na sa katapus-tapusan ng pag-aaral kung walang patunay ay sasabihing ang mga bagay na iyan ay galing sa isang singaw o produkto ng ebolusyon.

Pinagpauna na yan ng Bibliya noon pa.

1 Cor 3:19 Sapagka’t ang karunungan ng sanglibutang ito ay kamangmangan sa Dios. Sapagka’t nasusulat, Hinuhuli niya ang marurunong sa kanilang katusuhan:

Dalawa lang ang pagpipilian ng mga nabubuhay sa mundo. Mabuti o sa masama, Langit o sa impiyerno? Hindi puede dito yung neutral o nasa gitna sapagka’t isusuka ka ng Dios.

Rev 3:16 Kaya sapagka’t ikaw ay malahininga, at hindi mainit o malamig man, ay isusuka kita sa aking bibig.

Isang payo ang ibig kong iparating sa mga bumabasa ng blog na ito. Na huwag umasa sa kanilang sariling karunungan o sa karunungang natutunan sa mga pantas ng sanglibutan sapagka’t ito’y kamangmangan sa Dios.

Prov 1:7 Ang takot sa Panginoon ay pasimula ng kaalaman: nguni’t ang mangmang ay humahamak sa karunungan at turo.

1 Cor 2:13 Na ang mga bagay na ito ay atin namang sinasalita, hindi sa mga salitang itinuturo ng karunungan ng tao, kundi sa itinuturo ng Espiritu; na iniwawangis natin ang mga bagay na ayon sa espiritu sa mga pananalitang ayon sa espiritu.

At ang karunungang nagmumula sa itaas ay walang sukat.

Jn 3:34 Sapagka’t ang sinugo ng Dios ay nagsasalita ng mga salita ng Dios: sapagka’t hindi niya ibinibigay ang Espiritu sa pamamagitan ng sukat.

May mga taong ayaw tumanggap ng katuwiran. Sila’y tinatawag ng Kasulatan na mga mangmang. Kaya naman kahit anong paliwanag mo ay ayaw nilang dinggin. Para bang nagsasayang ka lang ng laway.